काठमाडौं । युवा तथा खेलकुद मन्त्री महेश्वर गहतराजले राष्ट्रिय फुटबल टिमका मुख्य प्रशिक्षक अब्दुल्लाह अलमुताइरीको विषयमा चासो राखेका छन् ।
मन्त्री गहतराजलाई भेट्न सिंहदरबार पुगेको अखिल नेपाल फुटबल संघ (एन्फा)का अध्यक्ष कर्माछिरिङ शेर्पासँग प्रशिक्षकको विषयलाई लिएर नवनियुक्त मन्त्रीले सोधखोज गरेका हुन् ।
मन्त्री गहतराजले एन्फा अध्यक्ष शेर्पासँग प्रशिक्षक अलमुताइरीको विषयमा सोधेका थिए । उनले अलमुताइरीलाई राष्ट्रिय टिमको प्रशिक्षकमा निरन्तरता दिने विषयमा एन्फा अध्यक्ष शेर्पासँग छलफल गरेका थिए ।
‘राष्ट्रिय फुटबल टिममा आएको परिवर्तनबाट सिंगो खेलकुद क्षेत्र उत्साहीत छ । खेलाडी र समर्थकले समेत मुख्य प्रशिक्षकलाई खोजेको अवस्था छ ।’ गहतराजको भनाई उल्लेख गर्दै मन्त्रालय स्रोतले भन्यो, ‘विभिन्न भनाईहरु बाहिर आएका छन् । प्रशिक्षक फर्काउने विषयमा पहल लिनुहोस ।’
साफ फुटबलको दौरान खेलकुद मन्त्रीले माल्दिभ्समा रहेको नेपाली टिमलाई फोन गरेर शुभकामना र बधाई दिएका थिए । मन्त्री गहतराजले मुख्य प्रशिक्षकसँग फोन सम्बाद गरेर फाइनल खेलको शुभकामना दिएका थिए ।
फाइनल खेलपछि नेपाल छाड्ने घोषणा गरेका अलमुताइरीको नेपाल भविष्य अनिश्चित छ । नेपाललाई साफ इतिहासमा पहिलो पटक फाइनल पुर्याएका अलमुताइरी पछिल्लो समय नेपाल फर्कन लचक भने देखिएका छन् ।
एन्फाले समेत अलमुताइरीलाई नेपाल फर्काउन पहल गरिरहेको छ । साफ लगत्तै कतार पुगेका एन्फा अध्यक्ष शेर्पाले अलमुताइरीसँग छलफल गरेका थिए ।
मन्त्री गहतराजसँगको भेटमा एन्फा अध्यक्ष शेर्पाले नेपाल फर्कन अलमुताइरी सकारात्मक रहेको प्रतिक्रिया दिए ।
उनले केही दिनमै अलमुताइरी नेपाल फर्किएर राष्ट्रिय टिमको जिम्मेवारी लिने आशा व्यक्त गरेका थिए ।
कतार फुटबल संघको सहयोगमा अलमुताइरीलाई एन्फाले राष्ट्रिय फुटबल टिमको मुख्य प्रशिक्षकको जिम्मेवारी दिएको छ ।
News Source: khelpati
