कोरोना संक्रमण रोक्न २५ जिल्लामा निषेधाज्ञा जारी

१८ वैशाख, काठमाडौं ।दोस्रो लहरको कोरोना संक्रमण बढ्दै गएपछि सरकारले ‘चेक ब्रेक’ गर्ने भन्दै विभिन्न निषेध आदेश जारी गरेको छ। 

निषेध आदेश जारी गरिएका ठाउँमा अत्यावश्यक बाहेकका कामका लागि सर्वसाधारणलाई हिँडडुल गर्न रोक लगाइएको छ। यस्तै, अत्यावश्यक बाहेकका सवारीका साधनहरु समेत सञ्चालन गर्न पाइने छैन। तराईं-मधेस तथा उपत्यकाका जिल्लाहरुमा ५०० र पहाडी जिल्लामा २०० सक्रिय संक्रमित पुगे प्रमुख जिल्ला अधिकारीले निषेधाज्ञा जारी गर्न सक्ने गरी मन्त्रिपरिषद्ले नै निर्णय गरिसकेको छ। 

मन्त्रिपरिषदको उक्त निणर्यपछि काठमाडौं उपत्यकाका ३ जिल्लासहित उपत्यका बाहिरका केही जिल्लामा वैशाख १६ गते (बिहीबार)देखि नै निषेधाज्ञा लागू भइसकेको छ। केही जिल्लामा भने शुक्रबार र  शनिबार तथा केही जिल्लामा आइतबारदेखि लागू हुने गरी निषेधाज्ञा जारी गरिएको छ। 

गृह मन्त्रालयका अनुसार शनिबार बिहानसम्म २५ जिल्लामा निषेधाज्ञा जारी गरिएको छ। ५ वटाबाहेक अन्य सबै जिल्लामा जिल्लाभर नै निषेधाज्ञा लागू हुने छ। बाँकी ५ जिल्ला मोरङ, दार्चुला, बर्दिया, कालीकोट र बाग्लुङमा भने संक्रमितहरु बढी भएको क्षेत्रमा निषेधाज्ञा लागू गरिएको छ। मोरङमा भने सोमबारदेखि जिल्लाभर नै निषेधाज्ञा लागू हुने गृह मन्त्रालयले जानकारी दिएको छ। 

बाँके, सुर्खेत, काठमाडौं, ललितपुर, भक्तपुर, कास्की, कैलाली, पर्सा, दाङ, कञ्चनपुर, पाल्पा, चितवन, रुपन्देही, सल्यान, सुनसरी, जाजरकोट, रुकुम पश्चिम, डडेल्धुरा, झापा र गुल्मी जिल्लामा जिल्लाभर नै लागू हुने गरी निषेधाज्ञा जारी गरिएको छ। निषेधाज्ञा जारी गरिएको कास्की जिल्लामा भने सवारी साधनमा जोर बिजोर प्रणाली लागू गरिएको छ। सल्यान, डडेल्धुरा, रुकुम पश्चिम र झापामा भने आइतबारदेखि मात्रै निषेधाज्ञा लागू हुने गृह मन्त्रालयले जानकारी दिएको छ। 

स्रोत : नेपाल लाइभ

facebook sharing button
twitter sharing button
sharethis sharing button

Facebook Comments

You may have missed