October 20, 2021

सवारी चालक अनुमतिपत्र लिखित परीक्षाको मान्यता १८ महिनासम्म

सवारीचालक अनुमतिपत्र

सवारी चालक अनुमतिपत्र लागि लिखित परीक्षा पास गरेका परीक्षार्थीले अब १८ महिनासम्म ट्रायल परीक्षा दिन पाउने भएका छन् । यसअघि लिखित परीक्षा पास गरेर ट्रायलमा फेल भएका परीक्षार्थीले ९० दिनभित्र २ पटकमात्र ट्रायल दिन पाउने व्यवस्था थियो ।
सरकारले कोभिड–१९ रोकथाम तथा नियन्त्रणको लागि लकडाउन गरेपछि लिखित परीक्षा पास भएका तर ट्रायल दिन नपाएका र पहिलोपल्ट ट्रायलमा फेल भएका परीक्षार्थीलाई लाभान्वित हुने गरि यो नियम जारी गर्ने तयारी यातायात विभागले गरेको हो । विभागले यसका लागि भौतिक पूर्वाधार तथा यातायात मन्त्रालयलाई सैद्धान्तिक सहमति माग गर्दा ९० दिनको समयसीमालाई बढाएर १८ महिना बनाउन सहमति माग गरेको विभागका सूचना अधिकारी डा. लोकनाथ भुसालले जानकारी दिए । उनले भने, “समय–सीमा बढाउन प्रस्ताव गरेर विभागले मन्त्रालयलाई सैद्धान्तिक सहमतिको लागि पठाएको छ । मन्त्रालयले स्वीकृति प्रदान गरेको खण्डमा ९० दिनको समय सीमा बढेर १८ महिना कायम हुने छ ।”
हाल तीनपटकसम्म पनि ट्रायल पास नभएका परीक्षार्थीले भने पुनः लिखित परीक्षा आवेदन गरेर पूर्ववतः प्रक्रियामा जानुपर्ने व्यवस्था रहेको छ । यसमा भने कुनै परिमार्जन भएको छैन । पहिलोपटक ट्रायल फेल भएका परीक्षार्थी सबैभन्दा बढी लुम्बिनी प्रदेशमा करिब १८ हजार रहेको बताइन्छ । यस्तै, हाल रोकिएको सवारी चालक अनुमतिपत्रको अनलाइन फारम प्रदेशले आवश्यकता अनुसार खुल्ला नीति रहेको यातायात विभागले जनाएको छ । सवारी चालक अनुमति खुल्ला गर्ने विषयमा विभागलाई वारम्वार जनगुनासो आएसँगै बुधबार विभागले सूचना जारी गरेको हो ।

Source:Karobaraily

Facebook Comments