अस्कर कलेजले तेस्रो युवा लघु–सिनेमा प्रतियोगिता गर्ने

काठमाडौंँ । नेपालको पुरानो सिनेमा कलेज अस्कर अन्तर्राष्ट्रिय कलेजले हरेक वर्ष गर्दै आएको लघु–सिनेमा प्रतियोगिताको तेस्रो संस्करणको लागि बुधबारबाट छोटा सिनेमाहरूको आव्हान गरेको छ । २० वर्षभन्दा मुनिका युवायुवती लक्षित प्रतियोगिताका विजेतालाई पुरस्कारको व्यवस्था समेत गरिएको छ । 

प्रतियोगितामा प्रथमले एक लाख, द्वितीयले पचास हजार र तेस्रोले पच्चीस हजार पुरस्कार प्राप्त गर्नेछन् । सान्त्वना पुरस्कार समेत रहेको प्रतियोगीताका पुरस्कार विजेता प्रतियोगीले अस्कर कलेज अध्ययन गर्ने चाहे कलेजले पचास प्रतिशत छात्रवृत्ति उपलब्ध गराउने समेत कलेजद्वारा जारी विज्ञप्तिमा भनिएको छ । 

प्रतियोगीताका लागि आव्हान गरिएका छोटा सिनेमाहरू कम्तीमा ८ मिनेट बढीमा १५ मिनेट हुनुपर्नेछ । भदौ ६ गते, शुक्रबारको दिनसम्म बुझाइसक्नुपर्ने समय सीमा तोकिएको प्रतियोगिताको उत्कृष्ट सिनेमाहरूको प्रदर्शनीसँगै विजेताहरू घोषणा भदौ १३ गते हुने छ । सोही समारोहमा पुरस्कार वितरण पनि हुनेछ । 

युवा पुस्तालाई सिनेमा निर्माणमा उत्प्रेरित गर्न तथा विभिन्न नयाँ प्रतिभाहरूलाई पहिचान गर्न यो प्रतियोगिता वर्षेनी आयोजना हुँदै आइरहेको कलेजले जनाएको छ । नेपालमा आयोजना हुने केहि छोटा सिनेमा प्रतियोगिताहरूमध्ये यो एउटा महत्त्वपूर्ण प्रतियोगिताको रूपमा परिचित छन् ।

News From Ratopati Online